قصيدة معرفش ( فى رثاء البابا شنوده ) للشاعر د/يوسف سليمان

قصيدة معرفش

ف رثاء البابا شنودة

هتوحشنى يابويا وهيوحشنى كلامك

هتوحشنى بسمتك وهيوحشنى صمتك وسلامك

معرفش اقول ايه ولا اعمل ايه

اسكت واطق ولا اسال امتى وليه

ليه تانى ماشفكش والمس ايديك

واسمع صوتك واشوف نظرة عينيك

الشئ الوحيد اللى عارفه انى ماعرفش

احزن ولا افرح اسكت ولا اصرخ برضو ماعرفش

قلت اكيد ده كلام اوهام البابا لسة عايش ما رحلش

وقلت هاجيلك واشوفك يوم الاربع

ورحت بس ماشفتكش فخفت

وسرحت وفى فكرى جريت ورمحت

ورجعت تانى وقلت الله يجازيك يا شيطانى

هتنسينى ايمانى سمعت صوت

من البابا بيقول اصحى وفوق

وبص لفوق هتشوفنى بصيت يابويا بس برضو ماشفتكش

قلتلى فين ايمانك فين سلامك قلت بعدك يابويا راح مارجعش

قلبى ضعف ونظرى يابويا محدود وللسما ما يجبش

قلتلى بص بقلبك وبدقة نبضك اسمع وشوف وحس

قلتله مش هاعرف قاللى عشان بودانك

سامعنى بس بقلبك انت ماسمعش

شايفنى بعيون الارض اما

بعيون السما انت ماشايفش

عايزنى بجسدى الارضى الفانى اما روحى انت ماعايزش

لو حبك ليا ارضى خلاص الجسم مات

لو حبك ليا ارضى خلاص الوقت فات

ارفع درجات حبك واطلع سلمة قلبك ورفرف فوق الارض

وانت هتشوف السلم وهتطلع وتشوفنى وانا واقف بكل الحب

قلت طيب يابويا هاسمع كلامك وادور على السلم

دورت ودورت بس برضو مالقتش

صرخت باعلى صوتى فينك يابويا عايز اشوفك

بس اشوفك لو حتى لحظة لو حتى لمحة بس ماشايفش

ومن حزنى برضو سرحت وفى فكرى تانى جريت ورمحت

راح جانى البابا وقاللى تانى تانى يابنى هتسرح وترمح

وهتبكى عليا انت بتبكى عليا ليه منالارض انا كنت هاخد ايه

لكن فى السماء انا عايش مع رب المجد

زى ماليه حياتى عالارض عشتها

وسط الملايكة والقديسين برفع حزن وانين

لايام وسنين من اللى على الارض شفتها

من محدود فى الارض بين وبين الرب خلا

لتحت رجلين الرب وتحت العرش فى السما

بسمع منك يابنى ومن غيرك وفى كل يوم بدى تقرير

بقوله ياربى ابنك ده عايز وابنك ده محتاج

كل يوم بصليلك وبدعيلك بالتوبة والتغير

واقول ابنك ده ضال بس جايزلما اشفعلك الرب يلبى الاحتياج

واوعى تقول بعد الكلام ده كله رفعت عينك بس ماشايفنيش

بص هنا جوة قلبك هتلاقينى لسة جواه برضو بعيش

بصيت يابا جوة قلبى وفى السما والمرة دى شفتك

وانت واقف وسط مجدك وانت بتضحك زى ماعرفتك

لسة بتضحك بابويا وضحكتك ملت السما

ودمعتك خلاص مافيش مانت مع الرب فى هنا

واقف جنبيك هنا البابا كيرلس والانبا بيشوى حبيبك من هنا

وبيقولك يا حبيبى شنودة تممت رسالتك اللى سبتهالك بكل اتقان وفنا

وخلصت ساعات شقاك على الارض دوق يا حبيبى شنودة يلا الهنا